स्पंदन

युवा कवि हेमंत का जन्म 23 मई 1977 को उज्जैन (म0प्र0) में हुआ। वे देश की सुविख्यात वरिष्ठ साहित्यकार श्रीमती संतोष श्रीवास्तव के पुत्र हैं। प्रारम्भिक शिक्षा आगरा से सम्पन्न करने के बाद मुम्बई से अपनी शिक्षा सॉफ्टवेयर इंजीनियर के रूप में पूरी की। चित्रकला एवं गिटारवादन में विशेषज्ञता प्राप्त एवं प्रादेशिक स्तर पर नाटकों का मंचन भी करने वाले हेमन्त ने 15 वर्ष की उम्र से ही कविताएँ लिखना प्रारम्भ कर दिया था। हेमंत ने उर्दू, मराठी का ज्ञान रखने के साथ-साथ हिन्दी, अंग्रेजी में सिद्धहस्त रूप से कविता लेखन कार्य किया है। प्रतिभा के धनी हेमंत 05 अगस्त 2000 की शाम को एक दुर्घटना का शिकार होकर हम सब के बीच अपने परिपक्व विचार अपने कविता संग्रह ‘मेरे रहते’ के रूप में छोड़ गये हैं। उनकी कविताओं का यहां ‘युवा स्वर’ स्तम्भ में नियमित प्रकाशन कर ऐसे होनहार पुत्र, प्रतिभाशाली व्यक्तित्व को इस रूप में विनम्र श्रद्धांजलि....

स्पंदन परिवार

------------------------------------------------------

अक्टूबर 10-फरवरी 11 == बुन्देलखण्ड विशेष ---- वर्ष-5 ---- अंक-3

युवा स्वर--हेमन्त

सिर्फ तुम्हारी हो रोशनी

मेरे आँसू मरुस्थल में

गिरते जाते हैं

और बालू सा सूख जाते हैं।

फिर भी उमड़ते तो रहते हैं।

मैं इस उमड़न को तुम्हारे लिये

रच देना चाहता हूँ

जिसमें हरे भरे, चाँद सितारे सज उठें।

मैं तुम्हारे लिए ऐसी झिलमिलाहट

रचना चाहता हूँ

जिसकी जगमग रोशनी

तुम्हारे अंधेरों को जगमगा दे

वे सब अंधेरे मेरे हों

और हरे भरे चाँद सितारों की खेती

हरी जगमग रोशनी

सब

सिर्फ तुम्हारी हो

सिर्फ तुम्हारी

------------------------------------------------------

श्रीमती संतोष श्रीवास्तव,

204 केदारनाथ सी0 एच0 एस0 लिमि0

सेक्टर 7, लेक गार्डन के पहले,

चारकोप बस डिपो के पास,

कांदीवली वेस्ट, मुम्बई - 400067

नौनीं लगे बुन्देली -- पुस्तक समीक्षा

2011-09-27T18:57:00.003+05:30

अक्टूबर 10-फरवरी 11 == बुन्देलखण्ड विशेष ---- वर्ष-5 ---- अंक-3

पुस्तक समीक्षा

नौंनी लगे बुन्देली (बुन्देली हायकु संग्रह)

कवि- राजीव रामदेव ‘राना लिधौरी’

प्रकाशन - प्र0 लेखक संघ, टीकमगढ़ म0प्र0

समीक्षक - एन0डी0 सोनी

प्रकाशन वर्ष - मार्च 2010

मूल्य 80 रु0 पेज 88

साहित्य में काव्य हमेशा से आकर्षण का केन्द्र रहा है। गद्य साहित्य जहाँ किसी बात का विस्तृत विवेचन करता है वहीं कविता संक्षेप में सारगर्भित बात को सौन्दर्यपूर्ण तरीके से प्रस्तुत करती है। काव्य-साहित्य के विकास में हिन्दी में भी अनेक प्रकार के छन्दों का प्रयोग हुआ है। वर्तमान समय में आदमी के व्यस्त जीवन में जहाँ समय का अभाव है वहीं क्लिष्ट और गूढ़ छन्दों को सुनने समझने की शक्ति का ह्रास हुआ है। इस समय आम आदमी सरल और आम बोलचाल की भाषा में छोटे छन्दों की कविता को अधिक पसंद करता है। यही कारण है कि रुबाइयों और क्षणिकाओं को सुनना और पढ़ना लोगों को ज्यादा भाता है। पाठकों की इसी प्रवृत्ति को समझते हुए श्री राजीव नामदेव ने लघुतम छन्द हाइकु में कविता करने का प्रयोग शुरू किया। इस जापानी छन्द में उन्होंने बुन्देली भाषा में पहला हाइकु संग्रह ‘नौनी लगे बुन्देली’ प्रस्तुत किया है।

हाइकु संग्रह ‘नौनी लगे बुन्देली’ में सौ हाइकु बुन्देली में लिखे गये हैं। जिसमें मानव जीवन के विभिन्न विषयों पर उन्होंने कलम चलाई है। संग्रह को पढ़ने से ऐसा नहीं लगता कि यह उनका पहला प्रयोग होगा। बुन्देली में ऐसा विशिष्ट संग्रह लिखकर उन्होंने जहाँ बुन्देली कवियों में अपना विशिष्ट स्थान बनाया है वहीं लोगों को एक नई राह भी सुझाई है। मुझे लगता है कि संग्रह को पढ़कर अन्य कवि भी हाइकु लेखन में अग्रसर हो सकते हैं।

संग्रह की शुरूआत कवि ने वंदना खण्ड द्वारा ईश प्रार्थना से की है। शुद्ध बुन्देली ढंग से श्री गणेश जी को प्रणाम करता हुआ हाइकु है-

गनेश जू खौं/दण्डवत परनाम/हों पूरे काम।। यह बहुत सीधी और सरल अभिव्यक्ति है। इसी प्रकार चिंतन खण्ड में आज के समाज के लिए सबसे आवश्यक बात को कवि कितने सहज ढंग से कह देता है अवलोकन करें-

पुरा परोस/हिलमिल रइयौ/गम्म खइयौ।।

मानव जीवन में मधुरतम रस शृंगार पर कवि ने अपनी कलम का जादू बिखेरा है। प्रकृति के शृंगार की छटा देखें-

बसंत आऔ/मउआ गदराऔ/आम बौराऔ।।

इसी बसंत से प्रभावित प्रेमी अपने हृदय का हाल प्रकट करता है-

कछु बचो न/बे अखियाँ मिलाकें/सब लैं गईं।।

श्री राजीव जी ने जहाँ बुन्देलखण्ड के फलों फसलों और खेलों का सजीव चित्रण कर उनकी विशेषताओं का को उजागर किया है वहीं देश प्रेम और राजनीति की पोलों पर कलम चलाना नहीं भूले। नेताओं के चरित्र की विशेषताओं पर हाइकु दृष्टव्य हैं-

कोरो पाखण्ड/नेतन कौ चरित्र/गिरदौला सौ।।

तथा

बखत परै/गदबद हैं देत/आज के नेता।।

हाइकु संग्रह में नामदेव जी ने एक ‘अन्य’ खण्ड रखा है जिसमें जीवन के अनेक पहलुओं पर हाइकु लिखे हैं जिनकी झलकियाँ वास्तव में अपने आप में अनूठी हैं। गरीबी और अमीरी की दो विपरीत झलकियाँ देखें-

कैसे जी रये/चून तक नइयाँ/आँसू पी रय।।

एवं

जब मिलत/खाबे कौं परें-परें/काय खौं करें।।

प्रस्तुत पुस्तक में ऐसे बहुत से हाइकु हैं जिन्हें पढ़कर मन पसन्द हो जाता है और खड़ी बोली से भी नौंनी बुन्देली लगने लगती है। संग्रह पढ़कर ही इसका आनन्द उठाया जा सकता है। कविता के इतने छोटे छंद में बुन्देली कहावतों का सफल प्रयोग करके कवि ने अपने काव्य कौशल का अच्छा परिचय दिया है। कुछ ऐसे हाइकु हैं जिनमें यदि बुन्देली के शब्दों को परिवर्तित कर दिया जाता है तो उसकी सुन्दरता में वांछनीय वृद्धि हो जाती है। आशा है भविष्य में लेखन में कवि के मन में उद्वेलित भावनाओं का प्रस्फुटन निश्चय ही अधिक प्रभावपूर्ण होगा जिसकी क्षमता नामदेव जी में है। जैसे-जैसे उनकी बुन्देली शब्द सम्पदा में वृद्धि होगी, उनके हाइकु लेखन में उत्तरोत्तर निखार आयेगा।

------------------------------------------------------

महामंत्री,

श्री वीरेन्द्र केशव साहित्य परिषद, टीकमगढ़ (म0प्र0)

दोऊ पच्छ: पूनों अमास -- बुन्देली कहानी

2011-09-27T18:54:00.002+05:30

अक्टूबर 10-फरवरी 11 == बुन्देलखण्ड विशेष ---- वर्ष-5 ---- अंक-3

बुन्देली कहानी--डॉ0 लखनलाल पाल

दोऊ पच्छ: पूनों अमास

ऊ लौट आओ तो दिल्ली से; दिवारी कौ त्योहार मनाबे के लानै। दिवारी तौ सब जंहगा मनाई जात। ऊ त्योहार उतऊँ मना सकत तो पै गाँव की दिवारी के मनाबे कौ खास करन मौन चराबो हतो। बारा सालें पूरी हो गई तीं आखिरी तेरवां साल रह गई। ई बारा सालन के बीच में का-का नईं घटो, और का-का नई बढ़ो, यौ ओखे जेहन में आझऊँ उतरा रहो। आखिरी साल मौन मथरा-बिन्दराबन में चराई जैहै। बारा साल के इकट्ठे मोर पंख जो बड़े जतन से एक-एक पंखा बीने ते उनकौ अब मूठा बन गओ है। बड़े भोरइयाँ ऊ खेतन से, परती में से पंख ढूँड़-ढूँड़ खें ल्याउत रहो। ई साल वे सब जमना जी में बहा दए जैहै। बारा सालन में ई मूठा से ओखें मोह हो गओ है। जमना जी के बहाए की याद में मन बुझ-बुझ जात। पै का करे येई परम्परा है। सब कोऊ निभाउत सो ओऊ निभा लैहैं। ओेखौं मन कसक उठो। लोई (गाय की पूँछ के बारन की बनी रस्सी) ओऊ जमना जल में सिरा दई जैहै। लोई खें पहलूँ पहल गरे में डारे सें ओखे बार बहुत गुच्चे ते। येई लोई तो मौन साधो की प्रेरणा हती। वे पच्चीस लरका इकट्ठे मौन चराबे खें ठाड़े भए ते। गुल्लू माराज (मौन कौ साथी) बछिया लए के बाद भूल से बोल गओ तो। संग के सब मौनियन ने डंड के रूप में अपने-अपने मूठा लदवाये ते। गाय कौ थोरौ सौ गोबर पानी में घोर खें आचमन करवाओ तो। जादा बोलत बाले गुल्लू माराज की हर साल येई दसा भई। ‘लाफ्टर चैनल’ की नाईं माराज दिन भर अपनी आदतन से सबरे मौनियन खें गुदगुदाउत रहे। दिन डूबे बछिया छुटावे के बाद तौ सब मौनिया गुल्लू की हरकत बताउत-बताउत पेट फुलै लेत्ते। मौन साधो के समै जरूर वे बेआवाज हँसत रहत ते। हँसत का मुस्कात रहत ते। नई बनियान, पैजामा या धोती तथा हाथ में मोर पंख लैंय मौनियन खें दिखखें किसन कन्हइया की याद आ जात। आखिरी साल में ओखें या खुसी है कि जीवन में एक पुन्न कर लओ। ईसुर की किरपा सें येऊ साल बिना बिघन बाधा के पूरी हो जावै सो सब बन गओ। ओने सब तइयारी कर लई। बजार से मिसरी नारियल, खीलें और जवा मौन पूजा के लानै खरीद ल्याओ। साबूदाना और सक्कर ऊ अपने उपास के लानै खरीद ल्याऔ। अब ओखे लानै घर की सफाई व पुताई रह गई ती सो अभै दो दिना कौ टैम है ओऊ हो जैहै। दो घर कच्ची माटी के बने हैं। खपरैल की छत में मकड़यारौ अपनौ पूरौ सामराज फैलाए हैं। गेरखें कच्ची माटी की बौन्ड्री बनी है। बौन्ड्री खपरन सें छबी है और भीतर बाहर से माटी गोबर के गुबरा से गुबरी है। चार महीना के पानी बरसे से दिवार ने धपरा छाँड दए। ऊ उन धपरन खें हुमसा खें फिर से गुबरा से गुबर है फिर ओखे ऊपर कलई पोत है। गिरस्ती के नाव पै घर में कछू डबला-डबुलियां और टूटो सो एक बक्सा है। टूटे से बक्सा खें दिखखें औखौ जी खट्टया गओ। औखो मतलब बल्लू....बल्लू माने बालादीन बल्दियत सुन्दरे बापू यानि कि सुन्दरलाल बापू।

बक्सा खें दिखखें बल्लू को मूं करवा गओ। बक्सा बहुत पुरानौ है। बाई (अम्मा) बताउत ती कि जब मो चलाव भओ तो तब नाना ने दो रुपइया में खरीद खें दओ तो। पहलूँ चीजें कितनी सस्ती हती। बल्लू सोचन लगो कि पहलूँ मुद्रास्फीति ऊ तो कम हती। ऊ समै कौ हजारी आज कौ करोरपति बरोबर भओ। बाई ने बक्सा जीवन भर सहेज खें राखो। ओखी एकाद नई धुतिया की हिपाजत येई बक्सा करत रहो। सुधरइया आए पै बाई ने कइयक देर सुधरवाओ। बक्सा कौ सब रंग उड़ गओ तो। ऊ धुबो-धुबो सौ लगत। बाई रोज बक्सा खें अपने अंसुअन सें धोउत रही। बा रोज काए रोउत पहलूं हम नादान भइया-बहन खें ओखौ रोबो एक रहस हतो। कभऊँ हमऊँ बाई कौ संग दै देत ते। जौन दिना हम बाई कौ संग दै देत ऊ दिना बक्सा और ऊजरौ हो जात्तो। हमाऔ बापू हठीलौ और जिद्दी हतो। पै हतौ बड़ौ धारमिक। बल्लू की अचानक ऊ बक्सा में रुचि बढ़ गई। काए रुचि बढ़ गई एखे दो कारन हते। एक कारन बाई और बापू की सुरत हती और दूसरौ कारन ऊ बक्सा पै गिरे ओखे अबोधपन के अंसुआ। ऊ अंसुअन में ऊ अपनौ बालपन तलासन लगो। बल्लू ने खपरैल की छत कौ मकड़यारौ झारबो बन्द कर दओ। ओनै ने बक्सा खोल लओ। बक्सा में फटे पुराने उन्हा लत्ता भरे ते। एक पुरानी सरट बल्लू की ऊ बक्सा में धरी ती। बापू कौ कुरता, बाई की धुतिया के अलावा बापू की एक फोटूअऊ धरी ती। बक्सा की येई पूँजी हती। बापू के पिचके गालन कौ मू निस्तेज हतो। फोटू में उनकौ पीरौ कुरता और माला चमक रई ती। या बात बल्लू खूब जानत है कि जब बापू की फोटू खिंची होहै तो बापू खूब खुस भओ होहै, पै खुसी की झलक ऊ गरीब के मूँ पै बिलकुल न हती। फिरऊँ फोटू में बापू ओखें अच्छौ दिखो। बापू और बाई के जब-कब के विभाजन में ऊ बरहमेस बाई के संगे रहो। बापू की आदतें बल्लू खें अच्छी नई लगत ती। बल्लू, बापू के एक पहलू पै सोचततो सो ओखें अंकगणित में बापू कभऊँ पास नईं भए। अगर बल्लू दूसरे पहलू पै विचार करतो ता हो सकत तो ऊ बापू खें कछु समझ पातो। पाठकन खें मैं बल्लू के बापू के दोऊ पहलू बताएं देत। अगर एकई पहलू पै कहानी लिखी जैहै ता बल्लू के बापू और ओखी बाई के साथ न्याय न हो पाहै। हाँ तो पाठको कहानी गौर से पढ़ियो।

बल्लू के बापू की कहानी

बल्लू के बापू कौ पहलौ पहलू उनकौ धारमिक होबो हतो। बल्लू ने बताओ तो कि हमाए बापू ने चार गुरु बनाए ते। उनके पहले गुरु ते श्री श्री 1008 स्वामी सरवानन्द जू जो सिवजी के परम भगत ते। अगड़बम्ब सिवजी की पूजा में वे रात दिना डूबे रहत ते। स्वामी जी बड़े चमत्कारी हते। सूखा की साल में उन्नै कई गाँवन में अपनी जोगसिद्धि सें पानी बरसाओ। बापू के सामूँ तो न जानै कितने चमत्कार करे ते। मसलन लुगाइयन के पलना भरे, जमीन जैजाद के झगड़ा निपटाये, जमीन में गड़ो धन बताओ पै कई आदमियन के भाग में धन नई बदो तो सो उन्हें धन न मिलो। माटी के कई गगरा मिले जिनमें या तो राख भरी मिली या सांप बिच्छू बैठे मिले। बापू उनके भगत हो गए और गुरुदच्छिया लैखें उनके परम चेला बन गए। सोउत होय चहाँ जगत होय उनके मू सें स्वामी जू कौ नाव कढ़त तो। मौका -बेमौका बापू मंजूरी छोड़ खें आसरम में उनके दरसन करखें किरतारथ होकें आउत ते। पै यौ हरामी कलकाल भगतन की बरहमेस परिच्छा लेत। पता नई बापू के मूंड़ पै कलकाल बैठ गओ कि भगवान ने परिच्छा लेंय के लानै बिना कौन्हउ कारन के बापू खें स्वामी जू के आसरम में पहुचा दओ। उतै कौ माहौल दिखखें बापू के पावन तरे की जमीन सरक गई। दो बइरें आसरम में किड़ी कों-कों कर रई ती। वे एक दूसरे खें सौत-सौत कहखें ऐसी गारी दै रई ती कि कौन्हउ निठल्लऊ सुनतो ता ओऊ लजया जातो। ऊ बइरन की ईरखा कौ कारन स्वामी जू हते। स्वामी जू कौ यौ रूप दिखखें बापू कौ भूत उतर गओ। बापू की धरमचरचा कौ रस बेस्वाद हो गओ। सिव बिसनू की गूढ़ कथाएँ जिनसें बापू के आनन्द की झिर खुल जत्ती, वे झिरें अब सूखन लगी। बापू के भक्ति रस कौ मानसरोवर रीचन लगो। कीचड़ ने उनकौ जीवन लिजलिजौ बना दओ। येई लिजलिजेपन में ऊ अपनौ सन्तुलन खो देत्तो। कभऊँ बल्लू पै ता कभऊँ बल्लू की बाई पै खिरझया जात्तो। बापू सिर्रयानो सौ रहन लगो। आदमी रसीलौ तो होतई है। बिना रस वालौं आदमी ठूंठ मानो गओ। कौन रस केखें झिरन लगै या ओखे सुभाव पै निरभर करत। जेखें सिंगार रस प्यारौ लगत ओखें सबरी दुनिया रसीली दिखात और जेखें बीर रस प्यारौ लगत ओखें बीर पुरखन की बीरता बखानत में साजी लगत। जेखें चुखरकटयाई साजी लगत ऊ चुखरकटी करें खें नई मानत, फिर भलई चहां पन्हइया घलैं। गुंडन खें गुंडई के रस कौ स्वाद भलौ। राजनीति कौ रस तौ छोड़ई देव, यौ रस सब पै भारी है, या यौ कहौ कि ई रस में सबरे रस हिरा जात। सांत सुभाव के आदमियन खें भक्ति कौ रस ठीक सें पच जात। पै अपच होय पै ओई के भीतर कौ सैतान अपने डहना फुलैउन लगत। बल्लू के बापू कौ सैंतान अपने डहना उचकाउन लगो। अब ऊ तनकई में बल्लू और ओखी बाई पै गुस्सया जात। ओखे मन में दुन्द हतो सो ऊ बरोबर अपने दुन्द सें लड़त रहो। ई दुन्द सें बापू जीत गओ। ई जीत कौ कारन हतो समाज में खुली आध्यात्मिक दुकानें। बापू जगन्नाथ गुरु के नगीच पहुँच गए। अब बापू चौकन्नौ हतो। तुरत-फुरत के काम से बचन लगो तो बापू। खूब ठोंक बजा खें उन्नै दूसरौ गुरु बना लओ। कछू दिनन में बापू खें अपने गुरु कौ अहंकार खटकन लगो। उन्हें अपने गुरु में भक्ति कम रौद्र रूप जादा दिखो। बापू खें उनकौ अहंकार न पचो। वे हंरा-हंरा वहाँ सें खिसक आए। बापू की सबसे बड़ी परेसानी हती कि वे पढ़े लिखे न हते नंईतर उन्हें किताबन सें कछु मिल जातो। खैर चौथे गुरु लौं आउत-आउत वे इकथिर हो गए ते। चौथे गुरु उनके मुहल्ला के पंडित रासबिहारी चौबे बने। वे एक दिना में हजार माला टारत ते। बापू ने चौबे जू खें गुरु बना लओ। सबसें पहलू उन्नै बापू खें एक माला दई और गुरुमंतर बापू के कान में सुनाओ -‘ऊँ भूर्भुवः स्वः तस्सवितुर्वरेण्यं भर्गो देवस्य धीमहि धियो योनः प्रचोदयात्।’ दो-तीन दिना के अभ्यास सें बापू खें मंतर मूखातर याद हो गओ। वेदन कौ आदि मंतर पाखें बापू हुलस गओ। ई मंतर के पाठ सें बापू के चित्त में सान्ति मिली। अब बापू होन वाले धारमिक अनुष्ठानन में खूब भाग लेन लगे। ई अनुष्ठानन में बड़े-बड़े बिद्वान आउत ते। बिद्वानन के मूँ से सुनो जीवन सार ने बापू के जीवन की दिसा बदल दई। भटके बापू ने लैन पकर लई। ‘अब मैं भटको बहुत गुपाल’ वाली बात खतम हो गई ती। कितनौ आत्म सन्तोष मिलत तो उन्हें ई मंतर सें। न जाने कित्ते आदमी जुरत चले गए।

उनको अब एक आध्यात्मिक परिवार बन गओ तो। ई परिवार में अधिकतर नौकरी पेसा सिच्छक ते। बीच-बीच में वे आपस में कारकिम कर लेत्ते। हरेक कारकिम में बापू अंगाऊ, फिर चहाँ मजूरी छोड़ने परै, चहाँ घर। बापू मजूर आदमी सो मजूरन वाले सब काम उनके हींसा में अपने आप आ जात्ते। वैसे वहाँ ऐसी समानता हती कि कोउ काम मंजूरी वालौ नई मानो जात्तो। सबसे बड़ी ‘मानव सेवा’ हती। हल्के-बड़े कौ सब भेद उतै खतम हतो, घर में चहाँ बनो रहाय। वे सब एक मालिक के मजूर हते। पै कभऊँ-कभऊँ झक्क उन्हा जरूर ई सबमें खलल डार देत्ते। झक्क उन्हन की जहाँ खें उंगरिया उठी वहाँ के सब काम हो जात्ते। धरम-करम के मामले में वे जादा जानत ते सो उनकौ मीठौ आतंक बापू जैसन पै फोर कर जात्तो। बिछाई तखत, माइक उठाबो-धरबो जैसे कामन खें बापू ऐसी लगन सें करत तो कि दिखत वाले ओखी बड़ाई करे सें अपने आप खें रोक नई पाउत ते। बापू तौ भगवान कौ काम करत सो चहाँ ओखी जान चली जाय, एखी का परवाह? ओई ने जीवन दओ अगर ओई के काम में जीवन चलो जावै ता कौन सी हानि है? कौन्हऊ हानि नहिया, लाभई लाभ है। चन्दा दए में बापू बरहमेस आंगू। चंग कौ सौकीन बापू भगवान कौ भजन बड़ी तल्लीनता सें गाउत। कभऊँ इस्टेज मिल गओ ता ऊ भाव विभोर हो जात्तो। वेद पुरानन पै, समाज में फैली कुरीतियन पै वहाँ घंटन चरचा होत्ती। ई कुरीतियन ने समाज खें बिगार दओ। सबने समाज में फैली कुरीतियन खें मिटाबे कौ बीरा चाब लओ तो। वे पच्छिम की सभ्यता से बापू खें चौकन्नों करत रहत ते। अनपढ़ बापू पच्छिमी सभ्यता खें साकार रूप में बड़े-बड़े निउ (नाखून) वाली सूपनखा मानत ते या बड़े-बड़े बारन की भुतनी। भुतनी और सूपनखा बापू के दिमाग में पूरी तरां से बैठ गई ती। निराकार चीज साकार रूप में कैसे दिखा जैहै सो बापू खें पच्छिमी सभ्यता की भुतनी कभऊँ नई दिखानी। पै अग्यात भै सें बापू दांदस जरूर पालें रहो। जब कभऊँ भै जादा लगन लगत तो ता बापू मनई-मन ‘ऊँ भुर्भुवः स्व.... ऊँ नमो भगवते वासुदेवाय....’ या ओखे कुल देहुरा जुन दिवार में थाप लए ते उनकौ सुमरन कर लेत्तो। बापू कौ सबरौ भै भग जात्तो। किताबन की लिखी बातें ऊ जुन अपने संगियन सें सुन लेत्तो वे बातें सब कहूँ बताउत तो। घर में बापू अपने लुगाई लरकन खें समझाउत तो। एक बात और बापू खें खुस करें रहत ती कि संगियन के घर ‘सरग’ जैसे हैं। सबके इतै अमन चैन है, पूरौ घर एक सूध में है, येई खुसी जब ऊ अपने घर में ढूड़त तो ता दूर-दूर लौ वा खुसी नई दिखात ती। ऊ भगवान की इत्ती सेवा करत तोपै भगवान ओखौ तनकउ खयाल नईं करत। आध्यात्मिक परिवार वाले कहत कि संसकार डारौ, संसकारन सें घर ‘सरग’ बनत। संसकार कहूँ दुकानन में तो मिलत नहिया है जुन बापू दो दिना मंजूरी कर खें खरीद ल्याबैं। कोऊ कहत संसकार जलमजात होत। जे बातें सुनखें बापू खें यौ लगन लगो कि अबकी देर कौ जलम अकारथ गओ। अब कहूँ और जलम लैहौ ता संसकार सुधर है। अब का होत? ई समाज में तौ नारद जैसी गिनती चलत। चहाँ एक से गिनौ, चहाँ आठ सें, सब अंक आठई होत। ई जलम के संसकार आंगू जलम में काम आहै। ई फारमूला में बापू पूरौ बिंध गओ। संग बालन खें भगवान ने सब कछु दओ, सरकारी नौकरी, भरो-पूरौ परिवार। उनके लरकऊ लैन सें लगत जा रए। मंजूर कहूँ न मिलै ता बापू डूँड़ पै डरे। छिरिया कैसो कान पकरखें कहूँ लिबा जाव। बापू खें टोंकने नई परत, घर कैसो काम करत। मानव सेवा सबसे बड़ी सेवा। कहू ईसें बड़ी सेवा होत है? बापू ऊपर बालें से डिरात। ओखे काम में कभऊँ गफलत नई कर सकत। डर इंसान खें महान बना देत। बापू मानत है कि सिद्धार्थ ने आदमियन खें दुख से जूझत दिखो। वे सजग हो गए। दूसरन खें ई दुख से कैसे बचावै, वे दिन रात गुनन लगे। संसार खें दुख से बचाबे के लानै वे कित्ते लड़े हौंहैं अपने दुंद से? भरो-पूरौ घरबार को छोड़ सकत? कोऊ नईं। सिद्धार्थ ने छोड़ दओ। प्यारी दुल्हनियाँ, लाड़लौ लरका, सबरौ राज। घर में बैठ खें ई लड़ाई सें पार नई पाओ जा सकत तो। गहन साधना से सिद्धार्थ बुद्ध हो गये। करुना, दया, अहिंसा, इकछाओ कौ दमन आदि ये हतयार मौत के लानै कारगर सिद्ध हो गए। लोभ, स्वारथ, जैसे बैरी के भगे सें दुख अपनौ रोबो दूसरन के सामूँ रोउन लगो। रूढ़ियाँ, कुरीतियाँ, हल्के-बड़े कौ भेद एक झटका में टोर दओ बुद्ध ने। यथास्थिति बाले बिलबिला परे। दुनिया में बुद्ध कौ डंका बज गओ। बापू खें थोरी-थोरी जानकारी सब कछू की हो गई ती। अपनी बात सिद्ध करें के लानै वे कहूँ खें ढड़क जात्ते। सब एकई बात तो है। सदघिर्रा कौ डंका बापूअउ ने बजाओ। बापू को भींजो डंका बाहर तो बुदबुदा जात्तो पै घर में डंका की आवाज पूरी तरां से दब जात्ती। बापू की लुगाई चोर सौ लरका चोरी सीक गए। बापू घर में संसकारन की खूब ढपली बजाउत पै घर की करकस आवाज में ढपली भौं बोलजात। कोउ बापू की सिखावन सुनै तब न? सुनतई नहियां कोऊ। पूरौ घर कान में पाल्हा लगाएँ तो। वे सोचत ते कि कहूँ धोके में संसकार कान में घुस गए ता ये तौ खेलई -बेल कर दैहैं। जानबरन खें पानी पिबाबे के लानै तला तक लै जाओ जा सकत, अगर वे पानी न पीहैं ता जबरई थोरी पिबाओ जैहै। येई दसा बापू की और ओखे घर की हती। बापू तिलमिला उठत तो। सबके ‘सरग’ जैसे घर ओखे जेहन में उतरान लगत ते। ओखौ पूरौ घर नरक, राच्छसन कौ डेरा।

बापू चतुर आदमी है, या बात ओऊ मानत रहो। ओनै अपनी पूरी कमाई लुगाई-लरकन खें कभऊँ नईं दई। कौन्हउ सामान की जरूरत परी ऊ खुद ल्याओ। रुपइया ऐसी जंहगा धरत तो कि कोउ नईं जान पाउत तो। बापू खें अभई कछू दिनन सें अपनी चतुरई पै संका होन लगी कांए कि ओखे धरे रुपइयन में से कभऊँ सौ रुपइया कम ता कभऊँ दो सौ कम होन लगे। जैसई आदमी की उम्मर बढ़त जात ऊ ऊसई बिसरा होत जात। ऊ येई समझत तो कि स्यात रुपइया इतनई हते। बापू खें ऊ दिना कर्रौ झटका लगो जब ओखे सबरे रुपइया एकदम सें गायब हो गए। ओखे पाँवन तरे की जमीन सरक गई। ओनै रुपइया भगवान की फोटू में धर दए ते। बापू ने फोटू के पाछूँ एक कागद लगा खें मोमिया चढवा लओ तो। फोटू और कागद के बीच में बापू रुपइया धर देत्तो। अब बापू खें घर कौ हरेक ससद्द (सदस्य) अपराधी दिख रओ तो। ओनै लुगाई-लरकन खें एक छियांव सें धुनबो सुरू कर दओ। किशोर बल्लू टूट गओ और सब जुरम रान दओ। बल्लू ने सातिर चोर की नाई सब रुपइया ठिकानै लगा दए ते। बापू ने अपनौ करम ठोंक लओ। या बात हींग की गंध की नाई सब कहूँ फैल गई। आध्यात्मिक परिवार के बीच में ओखे लुगाई लरका की खूब थुक्का-थाई भई। बापू सें सबकी सहानुभूति गढ़या गई। महतारी ने करम ठोंक लओ। लौंडा खें सौ दो सौ की जरूरत हती तो मोरहई से माँग लेतो। मोई और ई नाटपरे ने जुगाड़ मेट दई।

दृढ़ निस्चयी बापू ने आध्यात्मिक परिवार में जीवन कौ आधार पा लओ तो। और चीजें तो छनिक है। संगियन ने समझाओ कि साधना भिस्ट करें के लानै राच्छस बाधा डारत रहत। भगवान बरहमेस भगत की परिच्छा लेत। बापू खें समझ में आ गओ। अब परिवार के भिस्ट होबै कौ अपराध बोध ओखें नई हतो। जब कभऊँ ऊ एकांत में सोचत तो कि राच्छस सिरफ मोरहई इतै काए बाधा डारत, और कोऊ के इतै राच्छस काए नई जात। ईखौ समाधान बापू के पास नई हतो। फिरऊ बापू ने कर्रौ जी कर लओ कि राच्छस कितनऊ बाधा डारै, अब मैं अपनी साधना से न टर हों।

बल्लू की कहानी

दुबरौ-पतरौ बल्लू चड्डी-बनियानई में इस्कूल जान लगो। मास्टर ने ओखें कई देर इस्कूल से भगाओं कि साजे उन्हा पहर खें आ। घर में फटी पुरानी कमीज डरी ती (कौन्हऊ की उतरान) सो ऊ ओई पहर खें जान लगो। बल्लू बचपनई से मन कौ मौजी हतो। जब इस्कूल में नई पढनै सो ओई चड्डी बनियान में पहुँच जात्तो। मास्टर डिरेस पहरें के लानै बल्लू खें घरै पठै देत्ते। घर पहुँचो बल्लू फिर आउत इस्कूल? राम कहाव, ऐसई बिच्चा-खुच्ची पढ़खें ओनै आठ पास कर लओ। बाप की दीनता की छाप बल्लू पै साफ दिखात ती। कभऊँ जूता नहियाँ, ता कभऊँ पेन्ट नहियाँ। पेन्ट है ता पोंदन पै फटो, कमीज पछाऊँ सें मँजरी। अब ऊ इतनौ बड़ौ हो गओ तो कि अपनी हैसियत खूब कसखें जानन लगो तो। बापू कौ बीस दिना काम, पाँच दिना बिना काम कौ, बचे पाँच दिना सो वे भगवान के नाम के। नून तेलई में पिरान कढ़े आउत ते, बल्लू खें सजवो संवरबों कहाँ धरो तो। बापू के हींसा में बिसवा भर जमीन न हती। काऊ ने बटाई खें बै दई ता महतारी नींद गोड़ लेत्ती सो कछू खरचा चल जात्तो। लरका की पूरती करे के लानै ओऊ मंजूरी खें जान लगी। दो बिटियाँ तीन लरका हते बापू खें। बड़ी मौड़ी कौ तो जैसे तैसे बापू ने ब्याव कर लओ तो। हल्के लरका नंग धड़ंग हमजोली के लरकन में खेलत रहत ते। भूक लगी सो बगल वाले घर की दाई के इतै महतारी रोटी धर जात्ती। लरका उतई खा पी लेत्ते। अब बल्लू खें दरजा नौ में पढ़नै है सो बापू ओखें कसबा के कालेज में पढ़ाबे की सोचन लगो। साइकिल की पोबलम हती। ई पोबलम खें एक संगी आध्यात्मिक भइया ने पूरी कर दई। बापू ने पुरानी साइकिल की मरम्मत करवा लई। संकोची बापू खें कोऊ नहियाँ नई करत तो। बाप महतारी की कड़ी मेहनत सें बल्लू कौ एडमीसन और डिरेस किताबें खरिद गईं। कछू दिनन से बापू बाई कौ मन मिलन लगो तो। ऐसौ लगन लगो तो कि बापू कौ घर ‘सरग’ की नींव पर ठाड़ो हो रओ है। घर में एकता की लम्बी डोर खिंच गई ती। दोउअन की मंजूरी के ठीक रुपइया घर में आउन लगे। बल्लू नओ लरका, ई उम्मर में न जाने कितनी इकछाएँ जग उठत। एक इकछा ओखी मोबाल की हती। कभऊँ मामा कौ, कभऊँ बुआ कौ तो कभऊँ बहन के इतै से फोन आतइ रहत। बगल-बालन के पास मोबाल है सो उतईं बात हो जात्ती। अभाव आदमी खें समै सें पहलूँ बुद्धिमान बना देत। अभावन में पलो बढ़ो बल्लू उम्मर सें जादा चतुर हो गओ तो। दिन में बहन के सासरे से फोन आओ। बल्लू ने रिसीव कर लओ। बहन ने दिन डूबे बाई और बापू सें बात करें खें बोल दओ। बल्लू येई ताक में हतो सो फोन बाली बुढ़िया से उरझ गओ। बुढ़िया ने फोन कभऊँ नई छुओ पै ओखी बना-बिगरी पै बहुत ध्यान देत रही। कोऊ ने मोबाल के उल्टे-सूध बटन दबाये ता बा लाल हो जात्ती। बल्लू ने मोबाल के दो-तीन बटन दबा दए। बुढ़िया बल्लू पै खिरझया गई। बल्लूअऊ बुढिया पै दनदना गओ। ‘फोन सोने कौ आय का रुपइया मोई बहन के लगत ओमें तुमाव का जात।’ बल्लू की बातन से बुढ़िया खें आगी छुब गई-‘असल बाप सुन्दरा कौ होत ता मोय इतै फोन के लानै न आइए।’ ओऊ ने लापरवाही से कह दओ-‘हओ न आहौं।’ अब का है, बल्लू ने पूरौ जाल बिछा लओ तो। बापू नाव की मछरिया खें फंसें भर की देर हती। रात के आठ बजे फिर फोन आए पै डुकरिया ने सूधी नहियाँ कर दई। बापू ततोस में आ गओ। बल्लू कल मोबाल खरीद ल्याइये, चहाँ जै हजार कौ आवै। बापू की गरमी बढ़े से बल्लू खुस हो गओ।

बल्लू खें पढ़ाई और किताबें काल सी दिखात। जब ओनै दरजा आठ तक कछू नईं पढो तो अब का समझ में आहै। कमजोर मुन्यात पै महल ठाड़े नई हो पाउत। मुन्यात मजबूत तौ करनेई पर है। बल्लू कालेज रोज जात पै ऊसई जैसौ ओखौ नेम हतो। बापू समझत तो कि लरका में संसकार परन लगे। घर में बरजित चीजें गुटका, बीड़ी, बल्लू धकाधक चलाउन लगो। दो एक देर ठेकऊ पै जम गओ। लुंगा भइयन के संग में बैठखें गोसऊ खूब खाओ। ई सब चीजन में कितनौ मजा है, ओखें खूब समझ में आ गओ। बापू जानै का ऊटपटांग बकत रहत। सैंके-मैंके उल्टी सूधी मसकत रहत। बापू खें लगत कि भगवान ओखें सबसें पहलूं मिल है। हमाऔ बापू है चूतिया, बड़े आदमी भगवान खें पहलूँ लपक लैहैं। दारू में असलियत कभ जात, फिर चहाँ कोउ होवै। चहाँ औखौ बापू होवै, चहाँ गाँव कौ कौन्हऊ दबंग। लात पन्हइयन की का चिन्ता। सराबी सत्यान्वेखी होत। यहाँ बापू खें अपनी पूजा पै, अपनी साधना पै गरब होन लगो। ओऊ कौ लरका पढ़-लिख खें नौकरीपेसा आदमी बनहै। मोय अधूरे काम खें आंगू बढ़ा है। हालत ऐसी हती कि लरका खुस, बाप खुस। लरका की खुसी में और बाप की खुसी में जमीन-आसमान कौ अन्तर हतो। अगर ये दोऊ खुसियाँ संगै मिल गई तौ....ऐसी कल्पना बल्लू तौ नई कर सकत।

बाप बेटा की ई समानान्तर खुसियन में तिरयक रेखा की चुगलखोरी ने एकान्तर कोण बना दए। मतलब जितने अंस की बापू की साधना, उतनई अंस की बल्लू की आबारागर्दी। तिरयक रेखा सें बापू की चाल बदल गई। बापू कोणन के बीच में केन्द्रित हो गओ। ओखें ई बात कौ बिसवास कम भओ फिरऊँ एक दग्धा तौ भीतर बिड़ई गई ती कि बल्लू बिड़ी गुटका करन लगो है और बातन की जानकारी ओखें हती कि नई या भगवान जानै। बापू खें अपने संसकारन पै भरोसौ हतो कि ऊ लरका के बहके कदम लौटा लैहै।

दिन डूबें बापू की पाठसाला सुरु हो गई। ऐबन सें दूर रहो चहिए। या पच्छिमी सभ्यता आदमी खें बौरया देत। हमेसा ईसें दूर रहाव। अचानक बापू की जेब में डरो मोबाल टुनटुना परा, बापू के बखान में बाधा आ गई। बल्लू हँस परो-‘बापू पच्छिमी सभ्यता तुम्हाई जेब में मिमया रई।’ बापू कौ क्रोध भड़क उठो। पहलूँ बापू ने फोन रिसीब करो-‘पैसा-पैसा करती है, तू पैसे पै क्यों मरती है, एक बात मुझे बतला दे तू, रब से क्यों नहीं डरती है’ इस गाने को सबक्राइब करने के लिए एक दबाएँ। बापू ने गुस्सा में फोन ऑफ कर दओ। बापू कौ पारौ चढ़ गओ। एक तौ ई गाना सें, दूसरौ बल्लू की हरकत सें। आज ओखौ लरका ओई खें तिनगाउन लगो। बड़े-बड़े आदमी तो ओखी इज्जत करत...संग में बैठारत। यौ कल कौ लौंड़ा मोखें कहत कि पच्छिमी सभ्यता जेब में मिमयात। पच्छिमी सभ्यता सें तो बापू ऊसई डिरात। ई क्रोध और भै ने मिलखें बल्लू की दुरदसा करवा दई। बापू लट्ठ लैखें परो। बल्लू खें तरे से ऊपर लौं सोढ़ दओ। महतारी बीच में परी सो दो-चार ठौ लट्ठ ओऊ के हींसा में पर गए। सबरें लरकन-बच्चन कौ कउआ रोर मच गओ।

बल्लू ने फोटो की धूरा पोंछी। मो बापू धारमिक हतो ई में कोऊ संका नई हती। बापू लोक-परलोक में बहुत विसवास करत तो। जेमें सबसें जादा खटका ओखें परलोक की हती। परलोक सुधर जाय। हम पै ओनै कभऊँ ध्यान नई दओ। न तो कभऊँ ढंग सें कपड़ा मिले, न कापी किताबें और न खाबो पीबो। संग के लरकन खें सजो-धजों दिखखें उनके सामूँ मैं कितनौ हीन हो जात्तो। मैंनें भुगती सो महीं जानत। बिड़ी, गुटका, दारू तौ मैंने येई हीनता दूर करें के लानै सुरू कर दए ते। अगर कोऊ आदमी की औकात दस हजार रुपइया रिन चुकाबै की होबै और ओखें मूँड़ पै पाँच लाख कौ रिन धर रहबै ता ऊ चुकाबे में आलस कर जात। कहाँ लौ चुकाहै, चुकनैहै नहियाँ सो ऊ अपने सौक पूरे करन लगत। येई बात मोई हती। बापू ने जितनौ ध्यान अपनी साधना पै दओ ओसें आधौ ध्यान हम पै दओ होतो ता आज मैं कछू बन जातो। संग के आदमिन ने बापू कौ खूब उपयोग करो। कभऊँ-कभऊँ महूँ ने बापू कौ उपयोग कर लओ। फिर बापू की ढलत भई उम्मर दिखखें मौखे उनपै तरस आउन लगो तो। आखिर बाप तौ मोरहई आय। बापू अन्त समैं लौ परलोक सुधारें की बात करत रहो। अब पता नई बापू खें ‘सरग’ मिलो कि नईं। हमाऔ यौ लोक तौ चौपट हो गओ। अब हम तीनऊ भइया दिल्ली कमाखें अपनौ लोक सुधार रए हैं, स्यात सुधर जाय।

बल्लू की बाई की कहानी

मो आदमी जलम भर पूजा पाठ करत रहो। हारी-बीमारी जादा न भई ता उन्नै पूजा पाठ नई छोड़ी। मैं बरहमेस ई बात पै गरब करत रही कि मो आदमी चाल-चलन कौ साजौ है। दारू-मुरगा सें हमेसा दूर रहो। ये सबई बातें उनकी साजी हती पै भइया इत्ते भर सें तो जीवन गाड़ी नई ढिकलत। पहरबो-ओढ़बो, साजौ खाबो-पीबो येऊ तौ जीवन के अंग आय। दूसरन की बइरिन खें पहरें ओढ़े दिखखें जी तौ लौलया जातईं है। येऊ मैंने मन मारखें सटैओ। उन्नै औलादन सें मोई झोरी भर दई। यौ नई दिखो कि गिरस्ती की चादर कैसी है। सब लरकन ने एक-एक फुरफुरिया में जाड़ौ काटो। कौड़ौ ताप खें ठंड बचाई। कहत औरत आदमी की अरधांगिनी होत, यौ तो उनकी साधना बाली किताबनऊ में लिखो हौहै। हरेक चीज में मो आधौ हक हतो। तुम्हई सब जने बताऊ, हतो कि नईं? उन्नै घर की मालकी अकेले करी। मोय हांत पै कभऊँ चौन्नी नई धरी। कहत रहे बता कौन चीज की जरूरत है, मैं ल्याहों। जब बाजिब चीजें गिनाउतती ता कहत ते कि इतनी गुजास अभै नहियाँ, फिर कभऊँ दिखौ जैहै। फिर कभऊँ उनकौ कभऊँ नईं आओ। का करती मैं? जैसो बनो सो मैं करत रही। मैंने बल्लू के बापू के रुपइयन में से कछू रुपइया निकारे। चार-छैः देर पता नई चलो। जब पता चलो सो ऊ सत्तवादी ने मोई सब कहूँ भड़ाय उड़ाई। मोखें चोरनी....भड़ऊ। न जानै का-का कहो और न जानै कहाँ-कहाँ बताओ? संग बालन ने दोऊ पच्छ कभऊँ नईं निहारे। उन्हें का करनै? वे मौज में, उनकौ कौन कौन्हऊ काम आय थको रहो। फिर बापू उनके परिवार कौ हतो। उन्हें बापू की कमी काए खें दिखैहैं। चोरनी सबद कितनौ बुरओ है, मैं जानत। औरतें मोखें दिखखें कितनी खुसर-पुसर करत तीं। एक देर तौ लीला की बाई के मूँ सें मैंने साफ-साफ सुनो तो। वा बइरिन खें बता रई ती कि बापू बिचारौ गऊ या ओई की कमाई चुराखें पेरा-बरफी खा लेत। भइया मोखें ऐसौ लगत तो कि धरती फट जाय और मैं ओमें समा जाऊँ। ई आदमी ने मोई ऐसी भद्द कराई कि महीं जानत। इनके आध्यात्मिक परिवार में खूब नारी सम्मेलन होत ते मैं कभऊँ नईं गई। का करती उतै जाखें? मैं जानतती कि मोखें उतै भाला-बरछी के सिवा कछू नईं मिलहै। बइरें सब काम छोड़खे मोय ऊपर पिल परती। ई बुढ़रा ने मोई सब कहूँ सें गली छैंक दई ती। मो मन नईं करत तो का कि सबके संग में कहूँ जांव, बैठ खें बातें सुनौ। बकता का कहत उनके पिरबचन सुनौ। मैंने सोच लई ती भइया कि एखें सरग मिल है ता मो नरक कहूँ नई गओ। ई नरक सें ऊ नरक तौ थोरौ बहुत साजौ होहई। भगवान सबकी मजबूरी जानत। मोई मजबूरी जान लैहै ता ठीक है, न जान पाबै ता ओऊ भाड़ में जाबै। मूँड़ मूँड़ लैहित, टुँघरौ थोड़ी मूड़हित। मो तो रात दिन कौ रोबो-कुढ़बो हतो। लरकन सें मोखें कुल तसल्ली मिल जात्ती, मो बड़ौ लरका बल्लू साजौ है। मैं सोचत रही-‘धीरज धरौ, कभऊँ तो दिन बहुरहैं। कभऊँ सुख मिलहै। पै एखों दओ कलंक (चोरनी) ई जलम में मिट पाहै।’ यो सोचखें सरम सें गड़ जात्ती। बल्लू कौ पढ़बो दिखखे मो जी उमग जात्तो। बल्लू मो कलंक मिटा दैहै। जब ऊ अपसर बन जैहै ता मोई इज्जत बढ़ जैहै। कभऊँ-कभऊँ तै मोखें बल्लू के बापू पै दया हो आउतती कि ऊ अकेलौ कहाँ लौ काम करहै। आदमी आय मसीन थोरी है। पै ओखे उपदेस जिनमें जमीन-आसमान कौ अन्तर हतो, मोखें नई सुहाने। बल्लू कौ बापू हवा में जादा उड़त रहो। हवा संगियन ने भरी। धरती कौ सांच ओनै नई जान पाओ। हवा में उड़बौ और ककरन की धरती में चलबे में अन्तर है। ककरा गड़त ता आदमी दूनर-तीनर हो जात। बापू बरहमेस ई ककरन सें बचत रहो। मोखें कभऊँ-कभऊँ ऐसौ लगत तो कि मोई बुराई करे से ओनै अपनौ कद बढ़ा लओ। या बल्लू के बापू की भूल हती। अकेले में कद कभऊँ ऊँचौ नईं होत। वे सिरफ अपने मन खें भरमाउत रहे। मैंने निरनै कर दओ तो कि ऊ जीतो मैं हारी। हारी बइयर का कर सकत? सो थक हारखें महूँ ने मंजूरी करबो सुरू कर दई। अपने पेट में तो गाँठी लगाई जा सकत पै लरका थोरी मानत। हाट-बाजार, मेला-ठेला, मिठाई बालौ, बरफ बालौ दोरे में भौंपू बजाउत। लरका पिरान खात। एकाद होबै ता नांज-पानू सें बहटा देबै। ई भारजा के लानै तो खरौ-खरौ कागद कौ बड़ौ रूपइया चहिए। मंजूरी में काए की सरम।

यौ आध्यात्मिक परिवार बड़ौ दोगला रहो। बल्लू के बापू खें खूब बेसहूर बनाओ। आराम सें अपनौ काम निकारत रहे। मंजूरी करवाई पै ढंग सें मंजूरी के रूपइया न दए। हमाएँ का हतो येई मंजूरी तो हती। संगियन ने कारकिम कराऔ सो बल्लू के बापू दो दिना पहलूँ से लग गए और दो दिना बाद लौ लगे रहे। गाँव भर कौ सामान उठाउन गए फिर जहाँ कौ तहाँ धरन गए। रंग ऐसौ गाढ़ो धरो कि बापू भगवान कौ काम आय करत। यौ खुद बेसहूर रहो। मैंने कही सो मोई आबाज दबा दई। गुस्सा तो ऐसी लगत ती कि सबरैनन खें खूब गरयाऊँ, ऊँसई मो कटना नाव है। मैं रुक गई कि काए खें एखी बेइज्जती होबै। मो तो चोर कौ नाव हैई। मोई बुराई में सब खुस होत रहे, संग में येऊ खुसी होत रहे। एखें सरम न आई कि मैं केखी भड़ाय उड़वाउत हों। बापू के सामूँ इन्नै हमदरदी दिखाई और पीठ पाछूँ चूतिया समझो। मोई भद्द तो मोय आदमी ने करवाई नईंतर काऊ की मजाल हती कि कोऊ कछू कह जातो। मैं तो नीम कैसो घूँट पी-पीखें रही।

मैं बल्लू की आसा करें ती पै हुलकी परे नै ओनै मोई सब आसन पै पानी फेर दओ। मैं जानत ती कि यौ पढ़-लिख जैहै, ऊ लघरऊ नई पढ़ो। पइसा बरबाद करत रहो। घर सें घी गकरियाँ खबाखें इस्कूल पहुँचाउत रही उतै ऊ उचक्का लरकन के संग में डोलत रहो। उनकी का है, पढ़ गए ता पढ़ गए, नईंतर बक्खर तो डूंड पै डरो। पै ई नाटपरे खें सरम न आई कि हमाए पास का है। बाप ने कभऊ मुरगा-दारू नईं करो, एनै राच्छसपन रोप दओ। अपनी कमी में केखें रोती सो जलम भर घुटत रही। बाप ने जलम भर रुबाओ अब लरका करेजौ जारत। अब तो मैंने बाप-बेटा खें कहबो छोड़ दओ। ये राई-राई लरका और पल जावै सो जानी कि मो उद्धार हो गओ। नक्टन खें सरम नहियाँ ता मैं का करौं। बड़े भगत बनत हैं। ऊपर जाखें बताहैं कि मैंने लाखन माला सटका दईं पै लरकन खें धेलऊ नईं छोड़ो। का करनै? मैं सैकें खून जराउत हों। लोहू तो वे मो पहलईं पी गए, अब हड़रा बचे हैं सो ओऊ बार आवैं, इनकौ करेजौ जुड़ा जाय। वा ऐसई आँय-बाँय बकत-बकत दुनिया सें चली गई।

बल्लू की आँखन से अँसुआ टपक गए-‘बाई के भाग में सुख नईं बदो तो। घुटत-घुटत दोऊ आदमी समै से पहलूँ चले गए। आज हमाई कमाई दिखखें बाई और बापू खूब खुस होते।’ बल्लू ने अपने अँसुआ पौंछे।

-‘का दिख रए हौ? बापू की फोटू। बाप मताई के मरे के बाद लरकन खें उनके दए सुख याद आउत।’ बखरी की दिवार पोत रही बल्लू की लुगाई ने ओखें टोको। बल्लू के मूँ सें आह सी निकरी-‘हाँ तैंने सही कही लच्छमी।’

‘पाठको मैंने बल्लू, बल्लू के बापू और ओखी बाई की कहानी पूरी ईमानदारी से लिखी है। उनके मैंने सबरे साजे बुरए पच्छ आप लोगन के सामूँ धर दए। ई तीनउअन में सबसें जादा पच्छ कैखों बजनदार है। निरनै आपई खें करनै। या बात मैं तुम सब पंचन की चौपाल में पहुँचा रहो हों-जो लागै पंचन सब नीका।’

------------------------------------------------------

प्रबन्ध सम्पादक-स्पंदन

लालच कबहुँ न कीजिए, लालच विपदा-मूर -- बुन्देली लोककथा

2011-09-27T18:52:00.001+05:30

अक्टूबर 10-फरवरी 11 == बुन्देलखण्ड विशेष ---- वर्ष-5 ---- अंक-3

बुन्देली लोककथा--पं0 गुणसागर ‘सत्यार्थी’

लालच कबहुँ न कीजिए, लालच विपदा-मूर

कैबेखों लोभ और लालच इकई बात होत, अकेलें ऐसी बात है नैंय्याँ। कन लगत कै लोभी कौ धन लाबर खाय। इतेकई नइँ, लोभी की चमड़ी जाय अकेलें दमड़ी नइँ जा सकत। ईसें लोभ और लालच एक नइँ हो सकत। लोभी होबौ तौ सुभाव होत है, लालच तौ कभऊँअइ जी चाँय खों आ जात है, अच्छे-अच्छे लों बखत बेराँ पै लालच की चीकनी फिसलन पै रिपट परत हैं। सो एक लोभी सेठ जी हते, भौतई चतुर और सियाने। अपनों स्वारथ पूरौ करबे के लानें जी चाँय खों गढ़ा में ढकेल दैबै उनके लाजें सहज बात हती। बस उनकौ अपनों भलौ होंय चइये, दुनियाँ से उनें का लैंने-दैनें? चमड़ी जाय अकेले दमड़ी नइँ जाय की कानत के सेठ जी जियत सबूत हते। पइसा के लाजें प्रानन की बाजी लगा देत ते। भोर भई और बंजी खों कइ जावें, दिन डूबे लों बंजी करकें लौटत ते। कभँऊँ-कभँऊँ तौ अँधयारौलों हो जात तौ। ऊँट-घोड़ा तौ दूर, ना कछू एक साइकिल तक उननें नइँ लइ, जाँ जाँय गधा से लदे निगतई जावें। पूरौ कौ पूरौ माल बेंचबे के बादइ घरै लौटतते, जिदिनाँ पइसा-टका अच्छे आ जाँय सौ सोने की मुहरें बिसाकें फैंटा में अपनी कम्मर में कसें दौरत चले आवें।

ऐसेंइँ ऐसें एक दिना का भऔ, कै लोभी सेठजी की ऊ दिना गाढ़ी कमाई हो गई ती, सो उनने सोने की मुहरें बिसालईं। डाँग में से घर की गैल पकर लइ और दौरन लगे। इतेक में का भऔ, कै डाँग में एक रींछ ने सेठ जी खों देखौ ओर बौ इनपै टूट परौ। सेठजी ऐंनइँ दौरे, आँगे सेठ पीछें रींछ, काँलों भगते? एक बड़ौ सौ मउआ का पुरानों बिरछा देख कें सेठजी ऊ बिरछा खों घेर कें चक्कर लगा कें दौरन लगे। रींछ अपने दो गोड़िन पै ठाँडों होकें मउआ के लिंगा जा पोंचौ और आँगे के दोई गोड़े मउआ के दोई बगलै पसार कें नाँय-माँय होन लगौ कै अब तुम काँ जात? तुम जी बगलै जै हौ हम हाथ मारकें पटकई दै हैं....। सेठजी सोई छनकीले हते, उननें लपक कें रींछ के दोई गोड़े पकर लये और अपनी तरपै तानकें चकरघिन्नी करन लगे। बीच में मउआ हतौ सो रींछ सेठजी कौ कछू नइँ बिगार पा रऔ तो। दोई जने मठा सौ भाँवे लगे। एई खेंचातानी में सेठजी की कम्मर कौ फैंटा ढिलया गऔ और सबरीं मोहरें बगर गईं। अब सेठजी मनईं मनें सोच में पर गए कैं राँम। अब हम का करें? मोहरें छोड़कें भगबे कौ मन नइँ भऔ। इतेक में गाँव कौ एक भोरौ-भारौ जुवाँन पट्टा उतै सें कितउँ जात दिखानों। सेठजी नें जोर-जोर से ‘हूँ और, हूँ और’ कैबो सुरू कर दऔ। सुनकें बौ आदमी लिंगा आ गऔ, सेठजी से बोलौं ‘‘काय भैया, तुम जौ का तमासौ कर रहे हौ? बिचारे रींछ खों काय परेशान कर रये?’’ सेठ जी नें कई ‘‘तोय जे सोनें की मोहरें नइँ दिखा रइँ? जे मोहरें रींछ के पेट से उगलवाई हैं हमनें। रींछ के पेट में सोनें की मोहरन कौ खजानौ होत, जा बात तुमें पतौ है कै नईं? अबै तो हमें भौत मोहरें उगलवाउनें हैं।’’ बौ आदमी तो भौतई ईमानदार, मेहनत की कमाई में संतोष करबे बारौ हतौ। अकेले सोने की चमचमाती मोहरन की चकाचौंध में ऊकौ सत्य डिगन लगौ। बा के अन्तस में लालच पैदाँ हो गऔ। बौ बोलौ ‘‘काय भइया, रींछ से मोहरें सब कोऊ उगलवा सकत?’’ सेठ जी ने कई कै देख नइँ रये, हमने इतनी बिलात मोहरें उगलवाई कै नइँ? ऊ आदमी नें नोंनें मुड़ी मटका कें कई ‘‘सो तौ हम देखई रये हैं। तुमने तौ बिलात मोहरें पा लइँ हैं, अब गम्म खाऔ, दो-चार मोहरें हमइँ उगलवा लेवें ऐसौ नइँ हो सकत है का?’’ सेठजी तो जौ चाऊतइ हते कै कोऊ मूरख मिलै तो ऊखों हम रींछ के गोड़े पकरा देवे। सेठजी बोले ‘‘हमाई मनसा तौ अबै पूरी नइँ भई, अकेलें तुमाई भलमनसात देख कें सोचत हैं कै हम काऊ और दिनाँ रींछ पकरलें हैं, हमाऔ तौ रोजीना कौ जौई काम है। आज तुमइँ का कैहौ कै कोऊ भलौ आदमी मिलौ तो। तौ आऔ मजे से रींछ के दोई गोड़े कसकें पकर लो।’’ फिर का हती मेहनत करकें खाबे बारे सीधे-साधे आदमी ने लालच में परकें रींछ के गोड़े पकरइतौ लये। सेठजी बोले ‘‘भैया जू, अब तुम अपने रींछ खों ऊ बगलै घुमालो, जी सें हम अपनी मोहरें उठा लेवें, फिर तुम अपनी मोहरें उगलवाऊत रइयो।’’ सेठजी नें अपनी सबरीं मोहरें जाँ की ताँ बटोरीं और घर की गैल पकरकें नों दो ग्यारा हो गए। बौ लालची बिचारौ जाँ कौ ताँ अपने प्रान जोखम में डार कें रींछ के गोड़े पकरें ‘हूँ और, हूँ और’ कत रै गऔ। न बौ लालच में परतौ ना प्रानन पै ऐसी आफत बीदती। जई सें कई गई है कै-

‘लालच कबहुँ न कीजिये, लालच विपदा मूर,

जो लालच खों जीत लै, सोई साँचो शूर।’

अहाने के बहाने -- बुन्देली कहानी

2011-09-27T18:50:00.001+05:30

अक्टूबर 10-फरवरी 11 == बुन्देलखण्ड विशेष ---- वर्ष-5 ---- अंक-3

बुन्देली कहानी--हरिविष्णु अवस्थी

अहाने के बहाने

जाड़न के दिना हते। ओई पै दो-तीन दिना पैलउँ अच्छी माउठ पर गई ती। फिर जाड़े परमेसुरे की पूछने। अपने कूड़ादेव बारे दुर्गेशजू वा कवता नँइँ सुनाउन लगत.... ‘अरे अनै जीमई पैतो धरीती... हओलो आगइ खबर-परो जो जाड़ो कोड़ी काड़ा सो भइया’ साँसउ ऐसइ ठंड हती ऊ दिना।

सरसुती की मताइ कन लगीं ‘काय! इतइ आँगन में घामें में गुड़ा चूलो न धर लंय! अटाई में घुसतन तो जाड़े के मारैं प्रान से कड़त। मइंनाक पैलाँ उरदा दरे ते जबई की ठरूली धरी। कओ तो इतइ हुन ठरूला सैंकें देत, सो खा के हारे चले जावो दिन भर खों सुस्तई होजे।’

ठरूलन को नाव सुनतईं मों में पानी भर आव। हमने कई ‘नेकी उर बूझ-बूझ उलात करो। ठरुलन के संग खों तनक आदो उर दो पोथीं लासन की डार कैं धनन की चटनी सोउ बाँट लियो। ठरुलन को असली मजा तो चटनी के संगइ आउत।’

उनने ज्योरा कसैंड़िया उठाई उर धुतिया कंदा पै धरकें चलन लगी। हमने कई ‘कै अबै तो ठरुलन की बातें हो रइँतीं, अब काँ खौ चल दईं।’ वे कन लगीं के कुआ पै सपर कैं अब्बे आउत। उतई सैं सद्द पानी भर ल्याय।

इते तो जोन बेराँ से ठरुलन को नाव सुनो तो ओइबेरा सै लार चुचावे लगी ती। हमने कई ‘तुमे रोटी नोइ बनावनें कै बा बिना सपरैं नइ बन सकत। तुम तो उलात करो, ठरुला बनाव, सो हम खा के हारे-खेते जाँय। आज पानी की अपनी ओसरी सोउ है। उलायते पौच जैं सो संजा नो समदुआबारों सबरो खेत ढरजै।’

उनने ज्योरा कसैड़िया एक तरफे धरी। गईं सो गुड़ा चूलो उठा लिआइं। चूलो परचा कैं गईं सो हात पाँव धो चूले के गेरां पानी को किनछा लगाव उर ठरुली माड़बे बैठ गईं। चूले में से झार कड़न लगी सोऊ पै करइया धरकै चिकनई डार दई उर करैया को ताव देखन लगी। सरसुती खों टेर कैं ऊंसें कई कै बिन्नू तुम ऊपर सिलोटा पै होकैं चटनी वाट लिआव। उर अपुन ठरुला बेलन लगीं। करैया में पानी के छींटा मारे, जान लई कै करैया हो गई सो ठरुला सिकबे डार दओ।

हम झट्ट उठे उर हात-पाँव धो कैं उतई खूँटा पै सैं बोरा उठा कै बिछा कैं बैठ गये। अब करइया तरफै टुक्क लगाँय बैठे के कबै टाठी आबे उर अपुन भोग लगावें। हमने कइ कै अब झेल न करो, उलायतीं परसो। बे कन लगी ‘तनक गम्म तो खाव। तनक खैरो तो हो जान दो। कच्चो तो नोइ खाने।’

उनने करइया में झारो डारके ठरुला ओइ पै धरो रन दओ, उर दूसरो ठरुला उठा के सिकवे डार दओ। जोनो झारे पै धरे ठरुला की चिकनइ निचुर गई सो उए उठा के ऊमे से तनक टोर कै पैलउ चूले में छिटकी डारी फिर माय तुलसी धरा उर बेदी की तरफे छिटकी डार कैं कुपरा में धर लओ।

हमने कई ‘ओ परमेसरी अब काय नोइ पर्स रई।’ बे कन लगीं ‘कित्ती उलात मचाँय। जानत हो कै पैली रोटी, लुचइ अछूते बारी बिन्नू की होत। तनक और गम्म खाव।’ का करते, ठरुलन की जाँगा गम्म खाँय तनक देर और बैठे रय।

जोनो दो तीन और सिक गये सो उनने टाठी में दो ठउआ ठरुला उर चटनीं पर्स कै टाठी सामने धर दई। मोड़ी सैं कन लगीं ‘बिन्नू हमाय हात सकरे है तो हम बासन नईं छी सकत। तुम घिनोची पै सैं गड़ई उठा कै दद्दा खों पानी भरकै दै जाव।’

इते जाने कबसैं जीभ लपर-लपर हो रई ती। जैसइ टाठी सामुने आइ सो तुरतइ भगवान खों भोग लगाव, उर डट गय खावे खों। अबे एकइ डेढ़ ठरुला खा पावतो कै इत्तइ में करनजू ककाजू ने पोर में होकै टेरो ‘काय हो भगोने हारे नँईं चलने? हम कब की तुमाइ बाट हेरै दुआरें बैठे ते। झेल होत देखकै हमने सोची उतइ चल कैं देखें का हो रओ।’ हमने कई ‘ककाजू अपुन को बिराजवो होय, मैं अब्बई आउत।’

हमाय मों सैं जा बात कड़तन देर नँईं भई कै वे कन लगीं ‘काय हो तुम कैसे आहो, ककाजू सै जा कतन नँईं बनी कै आव ककाजू अपुनइ दो ठरुला जैंलो। बे कौन साँसऊ आय जात। अरे मो तो छिओ जात कै नँईं।’ हमने हराँ के कई ‘तुम जानती नँईंयाँ बे अबे हाल आय जात।’ अकेले बे काय खों मानवे बारी हतीं। उनकी जबरठेली में मोय कने परी ‘ककाजू दो ठरुला अपुन खौं चल जाँय।’

हमें कतन झेल नँईं भई कै ककाजूं दँयँ दंदेरा आँगन में आ गय। उतइ पानी को बोंगना भरो धरो तो तो चट्ट हात-पाव धोय उर हमाय लिंगा आके कन लगे ‘किते बैठ जाँय?’ हमतो पैलउ सैं जानत ते। उर हमें ई पै और तामस आ गऔ कै जे बड़े-बूढ़े जा नइ जानत कै बहु-बिटियन बारे घर में खाँस-खकार कै घुसौ जात। सो ततोस में हमाय मौं सै कड़ गई ‘ई हत्यारी जीभ पै बैठ जाव जी सैं कै आइ।’

------------------------------------------------------

अवस्थी चौराहा, किले का मैदान, टीकमगढ़ (म0प्र0) 472001